Tuisdorp

Vryheid

Skool

Hoërskool Pionier

Wie het jou matriekafskeidrok ontwerp / waar het jy dit gekoop?

My rok is ontwerp deur Gerrit Pienaar (Claris) , wat spesiaal die rok ontwerp het vir Tshego Gaelae se Mejuffrou Wêreld 2025 se skoonheidskompetisie waar sy gekroon was as Mej. Wêreld 2025 .

Wat was die inspirasie agter jou matriekafskeidrok?

Ek het maande lank gesoek na my rok, ’n rok wat my sou herken nog voor ek myself herken het. Ek het geweet ek soek iets met fyn detail asook ñ glans van goud en silwer . Ek sien die wêreld deur die oog van die klein dinge,die stille oomblikke wat die meeste beteken, die besonderhede wat vorm gee aan wie ek is en wie ek wil wees. Daardie klein dinge het my sag gemaak, maar ook sterk. Ek wou hê my rok moes my laat voel asof ek uiteindelik kan vier dat ek die stukkies van die lewe aanmekaar geweef het en myself getransformeer het in die sterk vrou wat ek altyd wou wees. Elke steentjie op my rok dra ’n herinnering , ’n oomblik van geloof, ’n poging na ’n val, ’n klein oorwinning oor myself. My uithouvermoë het my lig gemaak en daardie lig gloei nou in my rok soos die stille bewys dat ek aangehou het en bo uitgekom het.

Wat beteken jou matriekafskeidrok vir jou?

My matriekafskeidrok is uniek, een van ń soort, met ’n geskiedenis en trane van geluk wat daaroor gevloei het. Toe ek dit vir die eerste keer aantrek, het ek nog nie sy geskiedenis geken nie, maar ek het dadelik gehuil. Dit het gevoel asof ek daarin alles kan bereik, asof ek myself vir die eerste keer werklik kan wees. Ek wou my lig laat straal oor die wie se liggies dalk dof is, ń stil herinnering dat selfs in donker oomblikke, daar altyd lig kan wees. Die jong meisie in my, wat altyd buite die lyne ingekleur het in die kleuterskool,want ons was geleer om binne die lyne in te kleur , kon uiteindelik haar drome in volle kleur uitleef, want geen lyne het my beperk nie. Ek het gedroom, geglo en aangehou, en hierdie rok is die simbool van daardie drome wat lewendig geword het. Ek koester my matriekafskeidrok diep in my hart. Die sterk vrou, Mej. Wêreld, Tshego Gaelae, wat hierdie rok gedra en ons land verteenwoordig het, het ń verskil gemaak, en dit is presies waarna ek ook streef. Vroue is die hartjie van ons wêreld, die draers van warmte, troos en lig. Hierdie rok het my laat voel asof ek alles kan wees wat ek ooit wou wees en dat ek die lig in myself en ander kan laat skyn. Elke glans, elke steuntjie , elke klein detail van die rok vertel my verhaal, en ek sal dit altyd liefhê.

Hoogtepunt van die matriekafskeid

Die hoogtepunt van my matriekafskeid was toe my ma my help om my skoene aan te trek en my pa vir my kyk en sê: “Jy lyk mooi, my kind.” Iets kleins, maar vir my dogterhart iets groot en onbeskryflik. Ek het gefokus op my ma se gesig, die sorg en liefde daarin, en die gloei in my pa se oë. Op daardie oomblik het ek ń steuntjie op my rok aan hulle toegewy, want hulle het my gehelp om te wees wie ek vandag is. Dankie dat julle, mamma en pappa, nooit my inkleurlyne beperk het nie. My hakskoene was vasgemaak op die vierde gaatjie, ń simboliese herinnering aan stabiliteit en gronding. Die getal vier word dikwels geassosieer met ń stewige fondament, soos die vier fondamente van ń huis. Mamma en pappa is my vier : my grond, my stabiliteit, my balans en my lig.

Planne vir na matriek

Na matriek gaan ek Sielkunde studeer aan die Noordwes-Universiteit in Potchefstroom. Ek het nog altyd ń sterk begeerte gehad om mense te help om hulleself beter te verstaan en om hulle te ondersteun sodat hulle geestelike en emosionele gesondheid verbeter. Ek het onlangs die film “Dead Poets Society” gekyk, waarin akteur Robin Williams die konsep van “konformiteit” gebruik (1:04:18). Dit beteken: die aanpassing van jou gedrag, denke of houdings om by ń groep of sosiale norme te pas. Ons almal het ons eie unieke gedrag, denke en houdings. Dit is belangrik om te leer hoe om jou ware self te wees sonder om te voel dat jy by ander moet aanpas. Dit is nie net hoe ons die wêreld op ’n positiewe manier beïnvloed nie, maar ook hoe ons selfvertroue en selfwaardering ontwikkel. Sielkunde bied vir my die geleentheid om ander te help, empatie te ontwikkel en mense se lewens op ń betekenisvolle en positiewe manier te beïnvloed.

Gunsteling woord in Afrikaans

gedagtelug ń oomblik waarin jou gedagtes vrylik dwaal en jy oor idees, drome of moontlikhede dink.

Datum van matriekafskeid

2025-10-02